បន្ទាប់ពីការទទួលមរណភាពរបស់បិតាបដិវដ្ដអហឹង្សាប្រទេសអាហ្រិកខាងត្បូង លោក ណែលសុន ម៉ាណែលឡា កាលពីឆ្នាំ២០១៣ គឺមានមេដឹកនាំពិភពលោកជាច្រើនបានអញ្ជើញចូលក្នុងពិធីបុណ្យសពរបស់លោក ដែលបានសំដែងពីការសោកស្ដាយនៅការបាត់បង់វរជនដ៏ឆ្នើមសម្រាប់ពិភពលោក។
ហើយក៏មានការផ្ញើរសោកស្ដាយចំពោះជនបដឹវដ្ដអហឹង្សាររូប មិនតែប៉ុណ្ណោះក៏មានមេដឹកនាំនៅក្នុងតំបន់អាស៊ីក៏បានបញ្ចេញនូវទស្សនៈចំពោះលោក ណែលសុន គឺមេត្តាធម៌និងសេចក្តីក្លាហានរបស់លោក Nelson Mandela នេះហើយ ដែលជាប្រភពនៃការបំផុសគំនិតនៅក្នុងទីកន្លែងនានាដែលពលរដ្ឋនៅតែប្រឈមនឹងការរឹតបន្តឹងយ៉ាងខ្លាំងលើសេរីភាពមូលដ្ឋាន។
ចាប់ពីពលរដ្ឋសាមញ្ញរហូតដល់ជ័យលាភីរង្វាន់ណូបែល មនុស្សជាច្រើនបានចំណាយពេលប្រារព្ធអបអរដល់បុរសមួយរូបដែលក្លាយជានិមិត្តរូបសម្រាប់ជំហររបស់លោកក្នុងការទាមទារសេរីភាពដោយអហិង្សា។
លោកស្រី អោង សាន សូជី
អ្នកនយោបាយភូមាដែលជាមេដឹកនាំគណបក្សប្រឆាំងនិងជាជ័យលាភីរង្វាន់ណូបែលសន្តិភាព លោកស្រីអោង សាន សូជី បាននិយាយថា ប្រធានាធិបតីទីមួយរបស់អាហ្វិ្រកដែលត្រូវបានជ្រើសរើសតាមបែបលទ្ធិប្រជាធិបតេយ្យរបស់ប្រទេសអាហ្វ្រិកខាងត្បូងរូបនេះ បានជួយពិភពលោកទាំងមូលឲ្យយល់ថា គ្មានមនុស្សណាម្នាក់គួរត្រូវទទួលទណ្ឌកម្មដោយសារតែសម្បុរស្បែកនិងដោយសារតែគេកើតចំកាលៈទេសៈណាមួយនោះទេ។
«លោកក៏បានឲ្យយើងយល់ផងដែរថា យើងអាចផ្លាស់ប្តូរពិភពលោកបាន។ យើងអាចផ្លាស់ប្តូរពិភពលោកបាន តាមរយៈការផ្លាស់ប្តូរឥរិយាបទ និងទស្សនៈរបស់យើង។ ដោយសារហេតុផលនេះ ខ្ញុំសូមសម្តែងការគោរពដល់លោកថា ជាបុរសដ៏អស្ចារ្យមួយរូប ដែលបានលើកបទដ្ឋានមនុស្សធម៌ឲ្យខ្ពស់ឡើង»។
សម្តេចសង្ឃដាឡៃ ឡាម៉ា
សម្តេចសង្ឃដាឡៃ ឡាម៉ា ដែលជាមេដឹកនាំសាសនាភៀសខ្លួននៃដែនដីទីបេ និងជាជ័យលាភីរង្វាន់ណូបែលសន្តិភាព មានសង្ឃដីកាថា ព្រះអង្គបានចាត់ទុកលោកNelson Mandelaជាបងប្រុសជាទីគោរពរបស់ព្រះអង្គ។ សម្តេចសង្ឃ ដាឡៃ ឡាម៉ា ក៏មានសង្ឃដីកាផងដែរថា ព្រះអង្គសង្ឃឹមថា ការកាន់មរណៈទុក្ខចំពោះការស្លាប់របស់លោកMandelaនេះ នឹងត្រូវបានគេប្រើជាការបំផុសគំនិត។
«នេះជាពេលវេលាដ៏ក្រៀមក្រំសម្រាប់អ្នកទាំងឡាយរួមទាំងរូបខ្ញុំផង ដែលសរសើរដល់មនុស្សដ៏អស្ចារ្យនេះ។ ភាពក្រៀមក្រំ គឺគ្រាន់តែជាភាពក្រៀមក្រំហើយយើងបួងសួង តែវាគ្មានន័យច្រើនទេ។ តែរបៀបដែលយើងអភិវឌ្ឍន៍ការប្តេជ្ញាចិត្ត ឬ សន្ទុះចិត្តដើម្បីបន្តស្មារតីរបស់លោកនោះ គឺពិតជាមានសារៈសំខាន់ខ្លាំងណាស់ពីព្រោះ ជួនកាល ភាពក្រៀមក្រំ អាចក្លាយទៅជា កម្លាំងចិត្តដ៏មុតមាំជាងមុន»។
លោកអតិតប្រធានាធិបតីឥណ្ឌា Pranab Mukherjee
ចំណែកអតិតប្រធានាធិបតីឥណ្ឌាវិញបានមានប្រសាសន៍ថា ពិភពលោកបានបាត់បង់ជនជានិមិត្តរូបនៃមនុស្សធម៌ ឬដូចដែលលោកបានហៅលោកNelson Mandela ថា អ្នកតស៊ូ អ្នកប្រយុទ្ធ អ្នកប្រឆាំងនឹងភាពអយុត្តិធម៌ទាំងអស់។ លោកអតិតប្រធានាធិបតីបានប្រៀបធៀបលោក Mandela ទៅនឹងបិតាជាតិរបស់ខ្លួនគឺ Mahatma Gandhi។
លោកប្រធានាធិបតីចិន Xi Jinping
លោកប្រធានាធិបតីចិន Xi Jinping បានសរសើរលោក Mandela ថាជាបុរសជាតិមួយរូបដែលគេស្គាល់ពេញពិភពលោក ហើយបានលើកឡើងអំពីការដឹកនាំពលរដ្ឋអាហ្វ្រិកខាងត្បូងក្នុងការប្រយុទ្ធប្រឆាំងនឹងរបបរើសអើងជាតិសាសន៍អាប៉ាថេត (apartheid)។
លោក Xi ក៏បានលើកឡើងអំពីការចូលរួមចំណែករបស់លោក Mandela ជាមួយប្រទេសចិនផងដែរ ហើយថា លោក Mandela ជាស្ថាបនិកមួយរូបនៃទំនាក់ទំនងទ្វេភាគីរបស់ក្រុងប៉េកាំងជាមួយទីក្រុង Pretoria នៃប្រទេសអាហ្វ្រិកខាងត្បូង។ នៅឆ្នាំ១៩៩៨ ប្រទេសអាហ្វ្រិកខាងត្បូង បានផ្លាស់ប្តូរការទទួលស្គាល់ផ្នែកការទូតរបស់ខ្លួនពីកោះតៃវ៉ាន់ ទៅជាមួយចិនវិញ។
អ្នកដទៃទៀតដាក់ជាចម្ងល់ថាតើប្រទេសចិនអាចនឹងមានបុគ្គលណាស្រដៀងនឹងរដ្ឋបុរសអាហ្វ្រិកខាងត្បូងម្នាក់នេះឬទេ។ អ្នកប្រវត្តិសាស្រ្ត ហ្សាង លីហ្វាន់ និយាយថាប្រហែលជាមិនអាចធ្វើទៅ បានទេ។
លោកហ្សាងមានប្រសាសន៍ថាមានមនុស្សជាច្រើនបានសាកសួរតាមបណ្តាញអ៊ីនធឺណិត ថាតើប្រទេសចិនអាចនឹងមានមនុស្សណាម្នាក់ស្រដៀងទៅនឹងលោកនែលសិន ម៉ាន់ឌែលឡាឬទេ ហើយអ្នកខ្លះនិយាយថានោះគឺជារឿងវប្បធម៌។ លោកនិយាយថាលោកយល់ស្របនិងកត់សម្គាល់ថាវប្បធម៌និងគណបក្សកំម្មុយនិស្តដែលបានបង្កើតក្នុងសង្គមចិនធ្វើឱ្យពិបាកនឹងមានមនុស្សណាម្នាក់ដូចជាលោកម៉ាន់ឌែលឡា។