តើអ្នកស្រី Ashley Blazer Biden ជាអ្នកណា?
Ashley Biden ជាកូនស្រីតែម្នាក់របស់ Joe Biden ជាមួយភរិយាទី ២ លោកស្រី Jill Biden ដែលនាងជាសកម្មជនការងារសង្គមយ៉ាងផុសផុលមួយរូប។ បន្ទាប់ពីបញ្ចប់ការសិក្សាពីសាកលវិទ្យាល័យ Tulane និង សាកលវិទ្យាល័យ Pennsylvania នាងបានចាប់ផ្តើមអាជីពការងារផ្នែកសង្គមតាមរយៈការដែលនាងបង្កើតចំណង់ចំណូលចិត្តចំពោះបញ្ហាយុត្តិធម៌សង្គមដូចជាវិសមភាពប្រាក់ចំណូល។
នៅឆ្នាំ ២០១៧ ការលះបង់របស់នាងចំពោះសកម្មភាពនិយមប្រែទៅជាការបង្កើតយីហោម៉ូតមួយដែលមានឈ្មោះថាការចិញ្ចឹមជីវិត (LH) ដែលផ្តល់មូលនិធិដល់គំនិតផ្តួចផ្តើមសប្បុរសធម៌ផ្សេងៗ។ហើយនាងបានរៀបការជាមួយគ្រូពេទ្យវះកាត់លោក Howard Kerin ចាប់តាំងពីឆ្នាំ ២០១០ លោកស្រីក៏បានគាំទ្រយុទ្ធនាការប្រធានាធិបតីអាមេរិកឆ្នាំ ២០២០ ក្នុងការគាំទ្របេក្ខភាពឪពុករបស់អ្នកស្រី គឺលោក ចូ បៃដិន។
ជិវិតកុមារភាព និង ការអប់រំ
កូនស្រីប្រធានាធិបតីអាមេរិករូបនេះមានឈ្មោះពេញ Ashley Blazer Biden កើតនៅថ្ងៃទី ៨ ខែមិថុនា ឆ្នាំ ១៩៨១ ក្នុងរដ្ឋ Delaware សហរដ្ឋអាមេរិក។ យ៉ាងណាមិញ Ashley មិនមែនជាកូនស្រីទោលក្នុងត្រកូល Biden ឡើយ។ នាងមានបងប្រុសរួមឪពុកពីរនាក់គឺបងប្រុសច្បង Beau បានស្លាប់ដោយសារគ្រោះថ្នាក់ចរាចរណ៍ នៅឆ្នាំ ២០១៥ ហេតុការណ៍នោះហើយបានសម្លាប់ទាំងប្រពន្ធទីមួយរបស់លោក ចូ បៃដិន។ ហើយបងប្រុសម្នាក់ទី២ លោក Hunter និង បងស្រីម្នាក់ឈ្មោះ Naomi ត្រូវបានស្លាប់ដោយសារមហារីកខួរក្បាល នៅឆ្នាំ១៩៧២។
អ្នកស្រីបញ្ចប់ការសិក្សាបរិញ្ញាបត្រផ្នែក ការអភិវឌ្ឍមនុស្សនិងសង្គម នៅសាកលវិទ្យាល័យ New Orleans’ Tulane។ នាងក៏បានបញ្ចប់សញ្ញាបត្រអនុបណ្ឌិតផ្នែក សង្គមកិច្ច ពីសាកលវិទ្យាល័យ Pennsylvania ក្នុងឆ្នាំ ២០១០ ផងដែរ។ Ashley ជានិស្សិតម្នាក់ក្នុងចំណោមនិស្សិតបញ្ចប់ការសិក្សាទាំង ១២ នាក់ដែលបានទទួលពានរង្វាន់ John Hope Franklin ប្រយុទ្ធប្រឆាំងនឹងការរើសអើងជាតិសាសន៍របស់អាមេរិក។
ការងារក្នុងសង្គម
Ashley ធ្វើការជាសកម្មជនកំណែទម្រង់យុត្តិធម៌ និងជាបុគ្គលិកសង្គមកិច្ច អស់ពេល ១៧ ឆ្នាំរាប់តាំងពីរៀនចប់វិទ្យាល័យ រហូតដល់ឆ្នាំ ២០១៩។
បន្ទាប់ពីបញ្ចប់ការសិក្សានៅវិទ្យាល័យ អ្នកស្រីបានធ្វើការនៅអង្គការមិនរកប្រាក់ចំណេញ West End Neighborhood House ក្នុងនាមជាអ្នកសម្របសម្រួលការងារនិងការអប់រំសម្រាប់កម្មវិធីបណ្តុះបណ្តាលជំនាញនិងវិជ្ជាជីវៈដើម្បីយុវជន។
ឆ្នាំ ២០១២ ចូលបម្រើការងារនៅមជ្ឈមណ្ឌល Delaware ជាស្ថាប័នធ្វើការផ្នែកកំណែទម្រង់យុត្តិធម៌ព្រហ្មទណ្ឌនៅក្នុងរដ្ឋ ដែលតួនាទីពេលនោះ ជានាយករង។ កំលុងពេលនោះដែរ នាងដំណើរការកម្មវិធីនិងសេវាកម្មមួយដោយផ្តោតលើការអប់រំសាធារណៈ ជួយជនរងគ្រោះពេញវ័យ ប្រឆាំងអំពើហិង្សាលើស្ត្រីដែលជាប់ឃុំ និងការកិច្ចការសហគមន៍។
ក្នុងឆ្នាំ ២០១៤ អ្នកស្រីត្រូវគេតំឡើងឋានៈជានាយកប្រតិបត្តិនៃមជ្ឈមណ្ឌលនេះ និងបន្តបម្រើការងារនៅទីនោះ រហូតដល់ឆ្នាំ ២០១៩ ។ ទន្ទឹមគ្នានោះដែរ នាងបង្កើតកម្មវិធីមួយមានឈ្មោះថា SWAGG ក្នុងគោលបំណងលុបបំបាត់ឧក្រិដ្ឋកម្ម អំពើហឹង្សា និងសកម្មភាពក្រុមក្មេងទំនើងនៅតំបន់ New Castle County ។
នៅឆ្នាំដដែល អ្នកស្រីបង្កើតកម្មវិធីមួយទៀតឈ្មោះ Young @ Art ដោយអាចជួយនិស្សិតជាប់ឃុំ នៅក្នុងមន្ទីរឃុំឃាំង អាចច្នៃប្រឌិតសិល្បៈនានាលក់យកកម្រៃ។ ចំណូលពាក់កណ្តាលផ្តល់ដល់និស្សិតដែលជាម្ចាស់ស្នាដៃ ហើយពាក់កណ្តាលទៀតត្រូវវេរទៅទិញសម្ភារៈផ្គត់ផ្គង់បន្ត។ តាមរយៈកម្មវិធីនេះនាងក៏បានបង្រៀនសិស្សពីជំនាញរកស៊ី និងចំណេះដឹងផ្នែកហិរញ្ញវត្ថុផងដែរ។
នៅក្នុងវិស័យម៉ូដ
នៅឆ្នាំ ២០១៧ Ashley បង្កើតយីហោសម្លៀកបំពាក់មួយឈ្មោះ LH ដោយសហការជាមួយប្រេន Gilt Groupe និង Aubrey ដើម្បីរៃអង្គាសប្រាក់ចំនួន ៣ ម៉ឺនដុល្លារសម្រាប់មូលនិធិសហគមន៍ Delaware។
អ្នកស្រីបង្កើតយីហោនេះដើម្បីជួយប្រយុទ្ធប្រឆាំងនឹងវិសមភាពប្រាក់ចំណូល និងវិសមភាពពូជសាសន៍នៅសហរដ្ឋអាមេរិក។ ប្រាក់ចំណេញទាំងអស់ដែលបានមកពីការបើកដំណើរការយីហោ LH នៅក្នុងកម្មវិធី New York Fashion Week ត្រូវយកបម្រុងទុកសម្រាប់ផ្គត់ផ្គង់សហគមន៍ដែលកំពុងត្រូវការ។ រីឯ ១០ ភាគរយនៃការបន្តលក់របស់យីហោនេះត្រូវបានបរិច្ចាគដល់អង្គការសហគមន៍នៅសង្កាត់ Anacostia នៃរដ្ឋធានី វ៉ាស៊ីនតោន និងនៅទីក្រុង Wilmington រដ្ឋកាលីហ្វញ៉ា។
បច្ចុប្បន្ន ស្ត្រីវ័យ ៤០ ឆ្នាំរូបនេះ បានផ្អាកពីការងាររបស់ខ្លួន ដោយសារចូលរួមជាមួយឪពុកដើម្បីជួយឃោសនាបោះឆ្នោតជ្រើសរើសប្រធានាធិបតី កាលពីឆ្នាំ ២០២០។
ជីវិតអាពាហ៍ពិពាហ៍
ក្នុងឆ្នាំ ២០១០ បងប្រុសច្បងរបស់ Ashley គឺលោក Beau បានណែនាំនាងឱ្យស្គាល់គ្រូពេទ្យវះកាត់ម្នាក់ឈ្មោះ Howard Kerin។ ពួកគេទាំងពីរនាក់បានរៀបការ នៅក្នុងព្រះវិហារកាតូលិក Brandywine Roman Catholic Church នៅក្នុងក្រុង Greenville, Delaware នៅថ្ងៃទី២ ខែមិថុនា ឆ្នាំ២០១២។ ក្រោយមកអ្នកទាំងពីរបានរៀបការជាមួយគ្នានៅឆ្នាំ ២០១២ ហើយមកទល់នឹងពេលនេះ ពួកគេពុំទាន់មានកូននៅឡើយទេ។
បន្ទាប់ពីឪពុករបស់នាងប្រកាសពីការឈរឈ្មោះជាប្រធានាធិបតីនៅឆ្នាំ ២០២០ លោកស្រី Ashley បានចាប់ផ្តើមធ្វើយុទ្ធនាការដើម្បីលើកទឹកចិត្តដល់អ្នកបោះឆ្នោតដែលបានថ្លែងនៅក្នុងព្រឹត្តិការណ៍មួយនៅរដ្ឋ Wisconsin ស្ត្រីដើម្បី ចូ បៃដិន ដែលបានធ្វើឡើងកាលពីខែសីហា ឆ្នាំ២០២០។