ប្រវត្តិបុគ្គលល្បីៗ

មហាសេដ្ឋីវ័យក្មេង និង ជាឥស្សរជនប្រឆាំងប្រទេសថៃដ៏លេចធ្លោម្នាក់ លោក ថាណាថន ចឹងរូងរឿងកិច

នយោបាយ​ថៃ​បាន​ស្គាល់​ជំនោរ​ខ្យល់​ថ្មី ដោយនៅ​ថ្ងៃព្រហស្បតិ៍​ទី ១៥ មីនា ២០១៨ អ្នក​ជំនួញ​វ័យ​ក្មេង​ម្នាក់​បាន​ប្រកាស​បង្កើត​បក្ស​នយោបាយ​ ដ៏​ថ្មីស្រឡាង ដែល​មាន​ឈ្មោះថា ​« Future Forward » អនាគត​ទៅមុខ។ ជា​បក្ស ដែល​​ប្រមូល​ផ្តុំ​យុវជន​ជំនាន់​ថ្មី​ និង ​មាន​គោលការណ៍​ផ្សះផ្សា​ជាតិ ចេញ​ពី​ភាព​​វិល​វល់​ក្នុង​វិបត្តិ​អស់​រយៈ​ពេល​ជិត​១៥​ឆ្នាំ។ អ្នក​ជំនាញ​នយោបាយ​យល់​ថា បក្ស​ថ្មី​នេះ​ អាច​ដើរ​តួនាទី​ ដ៏​សំខាន់​នៅ​ក្នុង​ការ​បោះឆ្នោត​សភាថៃ ដែល​បានធ្វើ​នៅ​ខែ​កុម្ភៈ ២០១៩។

ជីវិតកុមារភាព និង គ្រួសារ

លោក ថាណាថន ចឹងរូងរឿងកិច (Thanathorn Juangroongruangkit) បានកើត និង ធំធាត់នៅក្នុងទីក្រុងបាងកក ប្រទេសថៃ ដែលស្ថិតនៅក្នុងគ្រួសារកូនកាត់ថៃ-ចិន។ ដោយម្តាយរបស់គាត់គឺលោកស្រី Somporn Juangroongruangkit គឺជាប្រធាន និង ជានាយកប្រតិបត្តិបច្ចុប្បន្ននៃក្រុមហ៊ុន Thai Summit Group ដោយលោកស្រីបានធ្វ់ើការកាន់កាប់ក្រុមហ៊ុនពីឪពុករបស់ Thanathorn គឺ លោក Pattana Juangroongruangkit បន្ទាប់ពីគាត់ទទួលមរណភាពក្នុងឆ្នាំ២០០២។

មិនតែប៉ុណ្ណោះ ក្រុមគ្រួសារ ត្រកូលJuangroongruangkit ក៏មានភាគហ៊ុនធំមួយនៅក្នុងក្រុមហ៊ុនប្រព័ន្ធផ្សព្វផ្សាយថៃ Matichon Publishing Groupថែមទៀតផង។ នៅពេលចាប់ផ្តើមអាជីពនយោបាយលោកថាណាថនបានលាលែងពីក្រុមប្រឹក្សាភិបាលម៉ានិចនិងក្រុមហ៊ុន Thai Summit Group។ ក្រោយមកម្ដាយរបស់ លោក ថាណាថន អ្នកស្រី Somporn ក៏បានលក់ភាគហ៊ុន Matichon របស់លោកស្រីចេញទាំងអស់ផងដែរ។

ដោយលោកមានឈាមជ័រដោយមានឪពុកម្ដាយសុទ្ធតែជាអ្នកជំនួញ ប៉ុន្តែលោកមានឪពុកមារបស់គាត់គឺលោក Suriya Juangroongruangkit គឺជាអ្នកនយោបាយដែលបានបម្រើការជារដ្ឋមន្រ្តីក្រសួងដឹកជញ្ជូនថៃចន្លោះឆ្នាំ ២០០២ និង ២០០៥។

ការអប់រំ និង ការសិក្សា

លោក Thanathorn បានចូលរៀននៅសាលា Triam Udom Suksa ក្នុងទីក្រុងបាងកក។ បន្ទាប់មកលោកបានបញ្ចប់ការសិក្សានៅវិទ្យាល័យ Thanathorn ទទួលបានបរិញ្ញាបត្រកិត្តិយសផ្នែកវិស្វកម្មមេកានិកពីសាកលវិទ្យាល័យ Thammasat និង សាកលវិទ្យាល័យ Nottingham។ ក្នុងអំឡុងពេលនេះគាត់បានក្លាយជាប្រធានសហភាពនិស្សិតនៃសាកលវិទ្យាល័យ Thammasat ក្នុងឆ្នាំ ១៩៩៩ ហើយក្រោយមកត្រូវបានគេតែងតាំងជាអគ្គលេខាធិការរងនៃសហព័ន្ធនិស្សិតថៃ។

ក្រោយមកគាត់បានចាប់អារម្មណ៍លើបញ្ហាសង្គម និង សេដ្ឋកិច្ ចហើយទទួលបានសញ្ញាប័ត្រអនុបណ្ឌិតចំនួន ៣ គឺមួយ ផ្នែកសេដ្ឋកិច្ចនយោបាយពីសាកលវិទ្យាល័យជូឡាឡុងកន មួយនៅក្នុងកម្មវិធីរួមគ្នាផ្នែកហិរញ្ញវត្ថុសកលពីសាលាអេសស្ទឺរនៃសាកលវិទ្យាល័យញូវយ៉ក និង សាកលវិទ្យាល័យហុងកុងនៃវិទ្យាសាស្ត្រនិងបច្ចេកវិទ្យា។ ក៏ដូចជាផ្នែកច្បាប់អាជីវកម្មអន្តរជាតិពីសាកលវិទ្យាល័យសេលឡិនថែមទៀតផង។

ពេញមួយការសិក្សាលោកថាណាថនបានចូលរួមជាមួយអង្គការមនុស្សធម៌ និង អង្គការក្រៅរដ្ឋាភិបាលផ្សេងៗដែលអំពាវនាវឱ្យមានកំណែទម្រង់សេដ្ឋកិច្ច និង សង្គមនៅក្នុងប្រទេសថៃរួមទាំងប្រជាជន និង សភាប្រជាជនក្រីក្រ។ ក្នុងអំឡុងពេលនេះលោក ថាណាថន បានធ្វើយុទ្ធនាការទាមទារដីធ្លី និង សិទ្ធិសំណងរបស់អ្នកភូមិដែលរងផលប៉ះពាល់ដោយទំនប់ប៉ាក់មុនីនៅខេត្តឧប៊ុនរ៉ាតថានីជាដើម។

ក្រុមគ្រួសាររបស់លោកក៏បានសម្តែងការព្រួយបារម្ភអំពីសកម្មភាពចលនានិស្សិតរបស់លោក ថាណាថននាពេលនោះដែរ។ លោកក៏ត្រូវបានបង្ហាញនៅក្នុងបទសម្ភាសន៍ជាច្រើនដែលលោក ថាណាថន មានទំនាស់ជាមួយពូរបស់គាត់គឺលោក Suriya Juangroongruangkit ចាប់តាំងពីគាត់នៅក្មេងភាគច្រើនដោយសារតែការមិនចុះសម្រុងរបស់ពួកគេទាក់ទងនឹងគម្រោងបំពង់បង្ហូរឧស្ម័នថៃ – ម៉ាឡេស៊ី។ លោកថាណាថនជឿជាក់ថាការស្ថាបនាទំនប់នេះបង្ហាញពីការខ្វះគណនេយ្យភាពរបស់រដ្ឋាភិបាលដែលបានឈានដល់វិបត្តិសេដ្ឋកិច្ចឆ្នាំ ១៩៩៧។

ការប្រឡូកចូលឆាកនយោបាយ និង ការបង្កើតគណបក្ស

ក្នុង​វ័យ​៣៩​ឆ្នាំ មហាសេដ្ឋី​វ័យ​ក្មេង លោក ថាណាថន ចឹងរូងរឿងកិច (Thanathorn Juangroongruangkit) ដែលជា​អ្នក​ស្នង​មរតក​នៃ​ក្រុមហ៊ុន​លក់​គ្រឿង​បំលាស់​រថយន្ត​ដ៏​ធំ​មួយនៅ​ប្រទេស​ថៃ​ គ្មាន​បទ​ពិសោធន៍​​ក្នុង​នយោបាយទេ។ ប៉ុន្តែ​លោក​មាន​ឆន្ទៈ​ចង់សំអិត​សំអាង​​មុខ​មាត់​នយោបាយ​ថៃ​ឡើង​វិញ។ ដើម្បី​សម្រេច​បំណង​នេះ លោក បាន​អំពាវនាវ​ និង ​ប្រមែប្រមូលសិល្បករ អ្នក​ច្បាប់ អ្នកការពារ​លទ្ធិ​ប្រជាធិបតេយ្យ និង​ សកម្មជន​សិទ្ធិមនុស្ស​ឱ្យ​មក​ចូលរួម​បង្កើត​បក្ស​ជាមួយ​លោក។

“ខ្ញុំ​អាច​មាន​សំណាង​ច្រើន​នឹង​ចូល​ពន្ធនាគារ … ប៉ុន្តែ​នេះ​ជា​គ្រោះ​ហានិភ័យ​ដែល​ខ្ញុំ​ត្រៀម​ទទួល​ជា​ស្រេច​ហើយ”។ នេះ​ជា​ប្រសាសន៍​របស់​លោក ថាណាថន ចឹងរូងរឿងកិច ក្នុងសន្និសីទកាសែត​​​បង្កើត​គណបក្ស​នា​ទីក្រុង​បាងកក ដោយ​បាន​បញ្ជាក់​ជំហរ​យ៉ាង​ច្បាស់​លាស់​ បរិហារ​ដោយ​ចំៗរដ្ឋាភិបាល​​ដែលបាន​ឡើង​កាន់​អំណាច​​​ដឹកនាំ​ប្រទេស​ដោយ​អាវុធ។ ​ជា​ពាក្យ​វាយប្រហារ​ដែល​សំដៅ​លើ​របប​សឹក​ ដែល​បាន​ធ្វើ​រដ្ឋប្រហារ​​ កាលពី​ឆ្នាំ​២០១៤ ដើម្បី​បាន​ក្តាប់​អំណាច​រហូត​មក​ទល់​ថ្ងៃ​នេះ។ ក្រៅ​អំពី​រិះគន់​រដ្ឋប្រហារ​ជាច្រើន​លើក​ច្រើន​សា លោកថាណាថន ក៏​បាន​លើក​ឡើង​ដែរ​អំពី​វិសមភាព​​សង្គម​ និង ​កង្វះ​ឯករាជ្យ​​ផ្នែក​ប្រព័ន្ធ​តុលាការ។

សម្រាប់​ប្រជាពលរដ្ឋ​ថៃ​ជា​ច្រើន ដែល​ធុញ​ទ្រាន់​នឹង​​មុន​មេដឹកនាំ​យោធា​ចាស់ៗ និង​ មេក្លោង​នយោបាយ​ដដែលៗ ការ​បង្កើត​បក្ស​ Future Forward​ “អនាគត​ទៅមុខ” របស់​លោក​ថាណាថន ប្រៀប​ដូច​ជា​បាន​ផ្តល់​កម្លាំង ​និង ​ពន្លក​នៃ​ក្តី​សង្ឃឹម​ថ្មី។ អ្នក​ជំនាញ​​នយោបាយ​មួយចំនួន​ គិត​ថា​បក្ស​នេះ មាន​គ្រប់​លក្ខណៈ​សម្រាប់​ទាក់ទាញ​ម្ចាស់​ឆ្នោតក្មេងៗ​ និង ​ជា​តំណាង​បក្ស​នយោបាយ​​ដ៏​សក្តិសម​នៅ​ក្នុង​ការបោះឆ្នោត​សភា ដែល​ ​រៀប​ចំ​ធ្វើ​នៅ​ខែ​កុម្ភៈ​ ឆ្នាំ២០១៩។ បក្ស​នេះ​ខុស​ប្លែក​ពី​បក្ស​ថ្មីៗជា​ច្រើន​ផ្សេង​ទៀត ដែល​ភាគ​ច្រើន រណបមេ​ដឹកនាំ​​យោធា។ អ្នក​វិភាគ​ខ្លះ​ទៀត សំលឹង​ឃើញ​ថា​លោក​ថាណាថន ជា​លោក​ថាក់ស៊ីន​ថ្មី​ ព្រោះ​គ្រាន់​តែ​ចូល​ប្រលូក​នយោបាយ​ភ្លាម លោក​ក៏​បាន​ទទួល​ប្រជាប្រិយភាពខ្ពស់​​នៅ​តាម​តំបន់​ជនបទ តាម​រយៈ​កម្មវិធី​នយោបាយ​ជួយ​សង្គម។

ការចោទប្រកាន់ពីបទប្រមាថព្រះមហាក្សត្រ តាមរយៈការបង្ហោះវីដេអូនិយាយពីវ៉ាក់សាំង

មហាសេដ្ឋីថៃ និង ជាឥស្សរជនប្រឆាំងដ៏លេចធ្លោម្នាក់ កាលពីថ្ងៃទី៣០ ខែមិនា ឆ្នាំ២០២១ ត្រូវបានចោទប្រកាន់ពីបទបរិហារកេរ្តិ៍ព្រះមហាក្សត្រថៃ បន្ទាប់ពីលោកបានចោទសួរពីការពឹងផ្អែករបស់រដ្ឋាភិបាលលើវ៉ាក់សាំងបង្ការជំងឺ COVID-19 ដែលផលិតដោយក្រុមហ៊ុនដែលមានទំនាក់ទំនងជាមួយគ្រួសាររាជវង្ស។ នេះបើយោងតាមការចេញផ្សាយដោយ ទីភ្នាក់សារព័ត៌មានបារាំង AFP នៅថ្ងៃអង្គារ ទី៣០ ខែមីនា ឆ្នាំ២០២១។

លោក Thanathorn Juangroongruangkit ជាស្ថាបនិកនៃគណបក្សអនាគតឆ្ពោះទៅមុខដែលត្រូវបានតុលារំលាយដោយត្រូវតុលាការចោទប្រកាន់ថាគណបក្សនេះ បានខ្ចីប្រាក់ខុសច្បាប់ជាង ៦លានដុល្លារ ពី Thanathorn ដែលជាមេដឹកនាំបក្សផ្ទាល់ផងដែរ។ លោកបានបង្ហោះវីដេអូនៅលើហ្វេសប៊ុកកាលពីខែមករា ២០២១កន្លងទៅ ដោយលោកបានចោទជាសំនួរជុំវិញថា តើរដ្ឋាភិបាលថៃបានពឹងផ្អែកខ្លាំងកម្រិតណាទៅលើក្រុមហ៊ុនថៃ សៃយ៉ាម បាយអូសាយអិន (Siam Bioscience) ដែលជាកម្មសិទ្ធិរបស់ស្តេច សម្រាប់យុទ្ធនាការចាក់វ៉ាក់សាំងរបស់ខ្លួននោះ?

តុលាការព្រហ្មទណ្ឌទីក្រុងបាងកកនៅថ្ងៃទី៣០ ខែមិនា​ ឆ្នាំ២០២១ បានសម្រេចចោទប្រកាន់លោក Thanathorn ពីបទប្រមាថព្រះមហាក្សត្រ និងឧក្រិដ្ឋកម្មកុំព្យូទ័រលើវីដេអូនោះ ប៉ុន្តែលោកបានបដិសេធ។

នៅក្រៅតុលាមហាសេដ្ឋីវ័យក្មេងរូបនេះ បានលើកឡើងថា«អ្វីទាំងនោះវាមានលទ្ធផលវិជ្ជមានទៅវិញទេ សម្រាប់លើកទឹកចិត្តរដ្ឋាភិបាលឲ្យវាយតម្លៃគោលនយោបាយវ៉ាក់សាំងឡើងវិញ ដើម្បីគ្រប់គ្រងស្ថានការណ៍ COVID-19 ឲ្យបានល្អ។ វាគ្មានអ្វីត្រូវព្រួយបារម្ភទេ»។

គួរបញ្ជាក់ថា អ្នកដែលត្រូវបានផ្តន្ទាទោសតាមច្បាប់បរិហារកេរ្តិ៍យ៉ាងតឹងរឹងរបស់ប្រទេសថៃ អាចប្រឈមនឹងការជាប់ពន្ធនាគាររហូតដល់ ១៥ឆ្នាំសម្រាប់បទចោទប្រកាន់មួយ៕

Related posts
ប្រវត្តិបុគ្គលល្បីៗ

ពីក្មេងដែលយាយីដោយជំងឺតស៊ូរហូតក្លាយជាប្រធានាធិបតីអាមេរិកទី២៨

ប្រវត្តិបុគ្គលល្បីៗ

តើលោក ដាញ់ ហុង អ្នក​បង្កើត​ហ្វុនអក្សរ​យូនីកូដជាអ្នកណា?

ប្រវត្តិបុគ្គលល្បីៗ

លោក Larry Tesler ដែលជាអ្នកបង្កើតមុខងារ Copy Paste និង ​Cut ងាយស្រួលប្រើដល់សព្វថ្ងៃ

ប្រវត្តិបុគ្គលល្បីៗ

មេដឹកនាំតាលីបង់សំខាន់៥រូបដែលបានដឹកនាំក្រុមសកម្មប្រយុទ្ធមួយនេះ​

Leave a Reply

Your email address will not be published. Required fields are marked *