ប្រវត្តិបុគ្គលល្បីៗ

មេដឹកនាំតាលីបង់សំខាន់៥រូបដែលបានដឹកនាំក្រុមសកម្មប្រយុទ្ធមួយនេះ​

តាលីបង់បាន​បង្ក​ការ​ភ្ញាក់​ផ្អើល​យ៉ាង​ខ្លាំង​នៅ​ពេល​ពួក​គេ​ដណ្តើម​កាន់​កាប់​ប្រទេស​អាហ្វហ្គានីស្ថាន​​​ដោយ​ត្រឹម​តែ​១០​ថ្ងៃ​ប៉ុណ្ណោះ​យក​បាន​រដ្ឋធានី និង ​ទី​ក្រុង​សំខាន់​ៗទាំង​អស់។ រហូត​ដល់​ពេល​នេះ​​​ក្រុមតាលីបង់បានបង្កើត និង ប្រមុខដឹក​នាំ​រដ្ឋាភិបាល​ថ្មី​ដោយមានមេដឹកនាំសំខាន់ៗបានកាន់តំណែងធំៗនៅក្នុងជួររដ្ឋាភិបាលថ្មីមួយនេះ ហើយក៏បានធ្វើការសម្របខ្លួនជាច្រើនចំណុចដើម្បីសម្របទៅតាមសហគមន៍អន្តរជាតិផងដែរ។ ប៉ុន្តែ​ថ្ងៃ​នេះ សូម​បង្ហាញ​​បុគ្គល​សំខាន់​៥​រូប​​ដែល​ដឹក​នាំ​តាលីបង់​សព្វ​ថ្ងៃ​នេះ។

លោក Mullah Abdul Hakeem

See the source image

ក្នុង​ខែ​កញ្ញា ឆ្នាំ​២០២០ តាលីបង់​បាន​តែង​តាំង​លោក Abdul Hakeem ជា​មេ​ដឹក​នាំ​ថ្មី​នៃ ក្រុម​ចរចារ​តាលីបង់​នៅ​ក្រុង​ដូហា។ អាយុ​ខ្ទង់​៦០​ឆ្នាំ លោក​ត្រូវ​បាន​គេ​រាយការណ៍​បើក​សាលា​បង្រៀន​មួយ​​​នៅ​ទី​ក្រុង Quetta ប្រទេស​ប៉ាគីស្ថដានជា​កន្លែង​ដែល​លោក​មើល​ការខុស​ត្រូវ​ក្រុម​តាលីបង់​នៅ​ទី​នោះ។ មេ​ដឹក​នាំ​តាលីបង់​ជាន់​ខ្ពស់​ជា​ច្រើន​ត្រូវ​បាន​គេ​រាយការណ៍បាន​ជ្រក​កោន​នៅ Quetta ដែល​ពួក​គេ​ដឹក​នាំ​ជា​ក្រុម។

ប៉ុន្តែរដ្ឋាភិបាល​​ទី​ក្រុងឥស្លាម៉ាបាដ​បានបដិសេធ​ពី​វត្តមាន​របស់​ក្រុម​ “Quetta Shura”។ លោក Hakeem ក៏​កាន់​តួនាទី​ជា​ប្រធាន​​ក្រុម​ប្រឹក្សា​សានសនា និង​ត្រូវ​បាន​គេ​ជឿ​ថា​​ជា​បុគ្គល​ម្នាក់​​ក្នុង​ចំណោម​មនុស្ស​ជិត​ស្និទ្ធ​​បំផុត​ជា​មួយ​អគ្គមេ​បញ្ជាការលោក Akhundzada។

លោក Sirajuddin Haqqani

See the source image

លោក Sirajuddin Haqqani អនុប្រធានកំពូល​របស់​ក្រុម​តាលីបង់។ បន្ទាប់​ពី​ Jalaluddin Haqqani ជា​ឪពុក​របស់​លោក​បាន​ស្លាប់​ទៅ​ លោក​បាន​ក្លាយ​ជា​មេ​ដឹក​នាំ​ថ្មី​នៃ​​ក្រុម​បណ្តាញ​ Haqqani ដែល​ត្រូវ​បាន​គេ​ជឿ​ថា​វាយ​ប្រហារ​ដោយ​ហឹង្សា​បំផុត​​នៅ​អាហ្វហ្គានីស្ថាន​ប្រឆាំង​នឹង​កម្លាំង​ទ័ព​អាហ្វហ្គានីស្ថាន និង​កម្លាំង​សម្ព័ន្ធ​មិត្ត​លោក​ខាង​លិច​ថ្មី​ៗ​នេះ។

ក្រុម​បណ្តាញ Haqqani សព្វ​ថ្ងៃ​​នេះ​​ជា​ផ្នែក​មួយ​ដ៏​មាន​ឥទ្ធិពលនៃកម្លាំង​សកម្មប្រយុទ្ធ​នៅ​ក្នុង​តំបន់។ អ្នក​ខ្លះ​និយាយ​ថា ក្រុម​នេះ​មាន​ឥទ្ធិពល​ខ្លាំង​ជាងក្រុម​រដ្ឋ​ឥស្លាម​នៅ​អាហ្វហ្គានីស្ថាន។

ក្រុម​ដែល​ត្រូវ​បាន​អាមេរិក​ចាត់​ទុក​ជា​អង្គការ​ភេរវកម្ម​មួយ​នេះ​បាន​ត្រួត​ត្រា​លើ​ទ្រព្យ​សម្បត្តិ​​យោធា និង​ហិរញ្ញវត្ថុ​របស់​តាលីបង់​ដែល​នៅ​តាម​បណ្តោយ​ព្រំ​ដែន​ប៉ាគីស្ថាន-អាហ្វហ្គានីស្ថាន។ លោក Haqqani ត្រូវ​បាន​គេ​ជឿ​ថា​អាយុ​ប្រហែល​៤៥​ឆ្នាំ ប៉ុន្តែ​ប្រវត្តិ​នៃ​ការ​ស់​នៅ​មិន​ត្រូវ​បាន​គេ​ដឹង​ច្បាស់​ឡើយ។

កាល​ពី​ឆ្នាំ​មុន កាសែត New York Times បាន​ផ្សាយ​​ថា មុន​ពេល​ចុះ​ហត្ថលេខាលើ​កិច្ច​ព្រៀម​ព្រៀងនៅ​ក្រុង​ដូហា លោក Haqqani បាន​សរសេរ​ថា ៖«រយៈ​ពេល​ជាង​​៤​ទសវត្សរ៍​នេះ ជីវិត​ពលរដ្ឋ​អាហ្វហ្គានីស្ថាន​ដ៏​មាន​តម្លៃ​បាន​បាត់​បង់​។ អ្នក​រាល់​គ្នា​ធុញ​ទ្រាន់​នឹង​សង្គ្រាម។ ខ្ញុំ​ជឿ​ថា ការ​សម្លាប់ និង​ការ​ធ្វើ​ទារុណកម្ម​ត្រូវ​តែ​បញ្ឈប់»។

លោក Mohammad Yaqoob

See the source image

លោក Mohammad Yaqoob ដែលជា​កូន​ប្រុស​របស់​ស្ថាបនិក​តាលីបង់ Mullah Mohammed Omar ត្រូវ​បាន​គេ​ជឿ​ថា អាយុ​ជាង​៣០​ឆ្នាំ​ប៉ុណ្ណោះ ហើយ​បច្ចុប្បន្ន​ជា​​មេ​ដឹក​នាំ​ប្រតិបត្តិការ​ផ្នែក​យោធា។ បន្ទាប់​ពី​ការ​ស្លាប់​របស់​អតីត​មេ​ដឹក​នាំ​តាលីបង់ Akhtar Mansour នៅ​ឆ្នាំ​២០១៦ សកម្មប្រយុទ្ធ​ចង់​តែង​តាំង​លោក Yaqoob ជា​មេ​បញ្ជាការ​កំពូល​ថ្មី ប៉ុន្តែ​អ្នក​ផ្សេង​មាន​អារម្មណ៍​ថា លោក​នៅ​ក្មេង និង​បទ​ពិសោធ​តិច។

យោង​តាម​កាសែត​ក្នុង​ស្រុក​ផ្សាយ​ថា លោក Yaqoob រស់​នៅ​អាហ្វហ្គានីស្ថាន។ នៅ​ពេល​តាលីបង់​បន្ត​ការ​វាយ​លុក​កាល​ពី​សប្តាហ៍​មុន លោក Yaqoob បាន​ជំរុញ​ឲ្យ​ក្រុម​សកម្មប្រយុទ្ធ​​កុំ​ប៉ះ​ពាល់​ដល់​សមាជិក​ទាហាន ឬ​បុគ្គលិក​រដ្ឋាភិបាល​អាហ្វហ្គានីស្ថាន និង​នៅ​ឲ្យ​ឆ្ងាយ​ពី​ផ្ទះរបស់​មន្ត្រីរដ្ឋាភិបាល​អាហ្វហ្គានីស្ថាន​ដែល​បោះ​បង់​ចោល​។ នេះ​បើ​យោង​តាម​ការ​ផ្សាយ​របស់ Associated Press។

លោក Abdul Ghani Baradar

See the source image

លោក Mullah Abdul Ghani Baradar ជា​បុគ្គល​សំខាន់​ម្នាក់​ក្នុង​ចំណោម​បុរស​៤​នាក់​ដែល​បាន​បង្កើត​ក្រុម​តាលីបង់​នៅ​អាហ្វហ្គានីស្ថាន​ឆ្នាំ​១៩៩៤។ លោក Abdul Ghani Baradar ​ជាសហ​​ស្ថាបនិក​ និង​ជា​អនុប្រធានក្រុម​តាលីបង់​ដែល​​​ទើប​​ទៅ​ដល់​ទឹក​ដី​​អាហ្វហ្គានីស្ថាន​​កាល​ពី​ថ្ងៃ​​ទី​១៧ ខែ​សីហា នេះ​​​ដែល​ជា​​លើក​ដំបូងចាប់​តាំង​​ពី​លោក​បាន​​​​ដើរ​តួនាទី​យ៉ាង​សំខាន់​​​ក្នុង​រដ្ឋាភិបាល​តាលីបង់​លើក​មុន​​​។

លោកបាន​កើត​នៅ​ខេត្ត Uruzgan ក្នុង​ប្រទេស​អាហ្វហ្គានីស្ថាន​ឆ្នាំ​១៩៦៨ និង​ធំ​ដឹង​ក្តី​នៅ​ទី​ក្រុង​ Kandahar ​ដែល​ជា​កន្លែង​កំណើត​របស់​ចលនា​តាលីបង់។ ជីវិតរបស់​លោក​បាន​ផ្លាស់​ប្តូរ​ជា​រៀង​រហូត​ដោយ​ការ​ឈ្លាន​ពាន​របស់​សូវៀត​កាល​ពី​ចុង​ទសវត្សរ៍​ឆ្នាំ​១៩៧០​ដែល​បាន​ជំរុញ​ឲ្យ​លោកក្លាយ​ជា​អ្នក​បះបោរម្នាក់។

ការ​ឈ្លាន​ពាន​របស់​អាមេរិក និង​ការ​ដួល​រលំ​របស់​តាលីបង់​នៅ​ឆ្នាំ​២០០១ លោក Baradar បាន​​ចាប់​ផ្តើម​លាក់​ខ្លួន​​​ និង​ត្រូវ​បាន​គេ​និយាយ​ថា លោក​នៅ​តែ​សកម្ម​​ក្នុង​ការ​ដឹក​នាំ​តាលីបង់​​​​ក្នុង​ការនិរទេសខ្លួន។

ពេល​ជា​មួយ​គ្នា​នេះ លោក Baradar ត្រូវ​បាន​គេ​ជឿ​​ស្ថិត​ក្នុង​ចំណោម​ក្រុម​បះ​បោរ​តូច​មួយ​​ដែល​បាន​ជួប​មេ​ដឹក​នាំ​អាហ្វហ្គានីស្ថាន​បណ្តោះ​អាសន្នលោក Hamid Karzai ជា​មួយ​នឹង​លិខិត​មួយ​ច្បាប់​ចែង​ពី​កិច្ច​ព្រម​ព្រៀង​ដ៏​មាន​សក្តានុពល​​​ដែល​​អាច​ធ្វើ​ឲ្យ​​ក្រុម​សកម្ម​ប្រយុទ្ធ​ទទួល​ស្គាល់​រដ្ឋាភិបាល​ថ្មី។

លោក Baradar ត្រូវ​បាន​ចាប់​ខ្លួន​នៅ​ប៉ាគីស្ថាន​ឆ្នាំ​២០១០ និង​​ត្រូវ​បាន​ឃុំ​​ ដោយ​សារ​មាន​សម្ពាធ​ពី​សហរដ្ឋ​អាមេរិក លោក​ត្រូវ​បាន​​​ដោះ​លែង​​នៅ​ឆ្នាំ​២០១៨ និង​បាន​ផ្លាស់​ទៅ​រស់​នៅ​ប្រទេស​កាតារ។ នៅ​ទី​នោះ​ លោក​ត្រូវ​បានតែង​តាំង​ជា​​ប្រធាន​​ការិយាល័យ​នយោបាយ​របស់​តាលីបង់ និង​ទទួល​ខុស​ត្រូវ​លើ​​លើ​កិច្ច​ព្រម​ព្រៀង​ដក​កង​ទ័ព​ចេញ​ជា​មួយ​អាមេរិក។

នៅ​ខែ​កុម្ភៈ​ ឆ្នាំ​២០២០ លោក Baradar បាន​បង្ហាញ​វត្តមានកំឡុង​ពេល​ចុះ​ហត្ថលេខា​លើ​កិច្ច​ព្រម​​ព្រៀង​នៅ​ក្រុង​ដូហា ដែល​ស្ថិត​​ក្រោម​អាមេរិក​​ដកកងទ័ព​ជា​ចេញ​​ជា​​​ថ្នូរដែល​​តាលីបង់​សន្យាមិន​ប្រើ​ប្រាស់​ប្រទេស​​ជា​កន្លែង​វាយ​ប្រហារ​អាមេរិក ឬ​សម្ព័ន្ធ​មិត្ត​ឡើយ។

លោក Hibatullah Akhundzada

See the source image

លោក Hibatullah Akhundzada បាន​ក្លាយ​ជា​​អគ្គ​មេ​បញ្ជាការ​កំពូល​របស់​តាលីបង់​នៅ​ខែ​ឧសភា ឆ្នាំ​២០១៦។ ក្នុង​ទសវត្សរ៍ឆ្នាំ​១៩៨០ លោក​បាន​ចូល​រួម​ជា​មួយ​កម្លាំងតស៊ូ​ឥស្លាម​និយម​ប្រឆាំង​នឹង​យុទ្ធនាការណ៍​យោធា​សូវៀត​នៅ​អាហ្វហ្គានីស្ថាន ប៉ុន្តែ​កេរ្តិ៍​ឈ្មោះ​របស់​លោក​ល្បី​ល្បាញ​ខ្លាំងខាង​​ក្នុង​នាម​ជា​​មេ​ដឹក​នាំ​សាសនា​ជាង​​តួនាទី​ជា​អគ្គ​​បញ្ជាការ​យោធា។​

លោក Akhundzada បាន​បម្រើ​ការ​ជា​ប្រធាន​តុលាការ​ Sharia នៅ​ទសវត្សរ៍​ឆ្នាំ​១៩៩០។ បន្ទាប់​ពីដណ្តើម​បាន​អំណាច​លើក​ដំបូង​នៅ​ទសវត្សរ៍​ឆ្នាំ​១៩៩០ តាលីបង់​បាន​ណែនាំ និង​គាំទ្រការ​ដាក់​ទោស​​​​យោង​តាម​ច្បាប់​​ឥស្លាម​របស់​ពួក​គេ​យ៉ាង​តឹង​រឹង។ ពួក​គេ​កាត់​ទោស​ប្រហារ​ជីវិត​ជា​សាធារណៈ​សម្រាប់​អំពើ​ឃាតកម្ម និង​កាត់​ដៃ​ជើង​សម្រាប់​ចោរ​លួច។

ស្ថិត​ក្រោម​ការ​គ្រប់​គ្រង​របស់​លោក Mullah Mohammed Omar (​ដែល​ត្រូវ​បាន​គេ​គិត​ថា​ស្លាប់​នៅ​ឆ្នាំ​២០១៣) តាលីបង់​បាន​ហាម​មើល​ទូរទស្សន៍ ការ​ប្រគំ​តន្ត្រី ភាពយន្ត ផាត់​មុខ និង​មិន​ឲ្យ​ក្មេង​ស្រី​អាយុ​១០ឆ្នាំ​ទៅ​រៀន​ឡើយ។ លោក Akhundzada ត្រូវ​បាន​គេ​ជឿ​ថា​អាយុ​ខ្ទង់​៦០​ឆ្នាំ និង​ភាគ​ច្រើន​បំផុត​រស់​នៅ​ក្នុង​ប្រទេស​អាហ្វហ្គានីស្ថាន។

ទោះ​បី​ជា​យ៉ាង​ណា យោង​តាម​អ្នក​ជំនាញ​ថា លោករក្សា​ទំនាក់​ទំនង​ជិត​ស្និទ្ធ​ជា​មួយ​ពួក​ “Quetta Shura” ​ដែល​ជា​ក្រុម​មេ​ដឹក​នាំអាហ្វហ្គានីស្ថាន-តាលីបង់​នៅទី​ក្រុង Quetta ប្រទេស​ប៉ាគីស្ថាន។ ក្នុង​នាម​ជា​អគ្គ​មេ​បញ្ជាការ​កំពូល លោក Akhundzada ទទួល​បន្ទុក​កិច្ច​ការ​នយោបាយ ទាហាន និង ​សាសនា។

សមាសភាពគណៈរដ្ឋមន្ត្រីបណ្ដោះអាសន្ន

  • លោក Hassan Akhund ជា​នាយក​រដ្ឋ​មន្ត្រី​បណ្តោះ​អាសន្ន​ថ្មីធ្លាប់​បាន​កាន់​តួនាទី​ជាអនុរដ្ឋ​មន្ត្រី​ក្រសួង​ការ​បរទេស​ពី​ឆ្នាំ​១៩៩៦ដល់​២០០១​នៅ​ពេល​តាលីបង់​គ្រប់​គ្រង​អំណាច​កាល​ពី​លើក​មុន។ លោក​មាន​ឥទ្ធិពល​ខ្លាំង​លើ​ផ្នែក​ចលនា​សាសនាជាង​ការងារ​យោធា។
  • លោក Sirajuddin Haqqani រដ្ឋ​មន្ត្រី​ស្តីទី​​ក្រសួង​មហា​ផ្ទៃ​ជា​មេ​ដឹក​នាំ​ក្រុម​សកម្ម​ប្រយុទ្ធ​ដែល​ត្រូវ​បាន​គេ​ស្គាល់​ថា​ជា​ក្រុមបណ្តាញ Haqqani ដែលមាន​ទំនាក់​ទំនង​ជា​មួយ​តាលីបង់ និង​ជាក្រុម​នៅ​ពី​ក្រោយ​​ការ​ប្រយុទ្ធ​​​ដ៏​ខ្លាំង​ក្លា​ក្នុង​សង្គ្រាម​២០​ឆ្នាំ​របស់​ប្រទេស រាប់​បញ្ចូល​​ទាំង​ការ​បំផ្ទុះ​គ្រាប់​នៅ​រដ្ឋធានី​កាប៊ុល​ឆ្នាំ​២០១៧​ដែល​សម្លាប់​មនុស្ស​ជាង​១៥០​នាក់។
  • លោក Mullah Yaqoob ជារដ្ឋ​មន្ត្រី​ស្តីទី​ក្រសួង​ការពារ​ជាតិ​។ លោក​ជា​កូន​ប្រុស​របស់​ស្ថាបនិក​តាលីបង់ និង​ជា​មេ​ដឹក​នាំ​កំពូលលោក Mullah Omar។
  • សហ​ស្ថាបនិក​តាលីបង់ លោក Mullah Abdul Ghani Baradar ជា​ឧបនាយក​រដ្ឋ​មន្ត្រី។
  • លោក Amir Khan Muttaqi ជា​រដ្ឋ​មន្ត្រី​ស្តីទី​ក្រសួង​ការ​បរទេស។

ប្រភព៖ BBC News

Related posts
ប្រវត្តិបុគ្គលល្បីៗ

ពីក្មេងដែលយាយីដោយជំងឺតស៊ូរហូតក្លាយជាប្រធានាធិបតីអាមេរិកទី២៨

ប្រវត្តិបុគ្គលល្បីៗ

តើលោក ដាញ់ ហុង អ្នក​បង្កើត​ហ្វុនអក្សរ​យូនីកូដជាអ្នកណា?

ប្រវត្តិបុគ្គលល្បីៗ

លោក Larry Tesler ដែលជាអ្នកបង្កើតមុខងារ Copy Paste និង ​Cut ងាយស្រួលប្រើដល់សព្វថ្ងៃ

ប្រវត្តិបុគ្គលល្បីៗ

មហាវរក្សត្រខ្មែរ វាយអ្នកបំបែកទឹកដី និង បង្រូមបង្រួមនគរឡើងវិញ ព្រះបាទសូរ្យវរ្ម័នទី២

Leave a Reply

Your email address will not be published. Required fields are marked *