ក្រុងព្រះសីហនុជាទីក្រុង ធំបង្អស់នៅប៉ែកខាងត្បូងនៃប្រទេសកម្ពុជា។ នេះ ជាក្រុង ដែលត្រូវបានបង្កើតថ្មី នៅឆ្នាំ ១៩៦៤។ ការបង្កើតក្រុងព្រះសីហនុ គឺដើម្បីរំឭក ដល់ស្នាដៃរបស់ព្រះបាទ នរោត្តមសីហនុ។ ឈ្មោះដើម របស់ក្រុងព្រះសីហនុ មុនឆ្នាំ១៩៦៤គឺ ក្រុងកំពង់សោម ។ ក្រុងព្រះសីហនុ ជាទីក្រុងកំពងផែសមុទ្រ ធំបង្អស់ នៅឆ្នេរសមុទ្ររបស់ប្រទេសកម្ពុជា។ ក្រុងព្រះសីហនុ ស្ថិតនៅពាក់កណ្តាល ចន្លោះថៃ និង ប្រទេសវៀតណាម ហើយទីក្រុងព្រះសីហនុ ជាទីក្រុងសំខាន់ជាងគេ នៅឈូងសមុទ្រថៃ។
ក្រុងព្រះសីហនុ ជាកន្លែងដែលគួរឲ្យចាប់អារម្មណ៍ណាស់ សម្រាប់ទេសចរជាតិ និងទេសចរអន្តរជាតិ ។ យោងតាមឯកសារ ក្រសួងទេសចរណ៍ នៃប្រទេសកម្ពុជា បានឲ្យដឹងថា ក្នុងឆ្នាំ២០០៦ មានចំនួនទេសចរអន្តរជាតិ ប្រមាណជាង ៣២០,០០០ នាក់ មកទស្សនា ក្រុង ព្រះសីហនុ។ ខែមករា ឆ្នាំ ២០០៧ ព្រលានយន្តហោះ នៅក្រុង ព្រះសីហនុ ត្រូវបាន បើកសម្ពោធ ដើម្បីការហោះហើរជាសំខាន់ ក្រុងសៀមរាប-ក្រុងព្រះសីហនុ ហើយតាមគម្រោង នៃរាជរដ្ឋាភិបាល បានឲ្យដឹងថា ព្រលានយន្តហោះនៃក្រុងព្រះសីហនុ នឹងក្លាយជា ព្រលានយន្តហោះអន្តរជាតិ នៅឆ្នាំ២០១០។
១. ប្រវត្តិក្រុងព្រះសីហនុ
- ឆ្នាំ ១៩៥៥ រដ្ឋាភិបាលបានចាប់ផ្តើមធ្វើកំពង់ផែ នៅចំកណ្តាលព្រៃជិតមាត់សមុទ្រ នៅកន្លែងមួយដែលបច្ចុប្បន្ននេះមានឈ្មោះថា ឆ្នេរហាវៃ ហើយធ្វើការសាងសង់រួច នៅឆ្នាំ ១៩៦០ ដោយមានជំនួយឧបត្ថមពីប្រទេសបារាំង ហើយនិងគេបានធ្វើផ្លូវពីក្រុង ភ្នំពេញ ដល់កំពង់ផែថ្មី ដោយមានជំនួយឧបត្ថម្ភពី សហរដ្ឋអាមេរិក ប្រជាជនដែល បានរស់នៅទីនោះគឺពួកគេធ្វើការនៅកំពង់ផែនោះ៕ ពេលកំពុងផែបានសាងសង់រូចហើយ គេបានហៅទីក្រុងនោះ ថា ក្រុងព្រះសីហនុ សំរាប់ធ្វើជាការគោរពចំពោះបិតាជាតិ។
- ឆ្នាំ ១៩៦៣ គេចាប់ផ្តើមសាងសង់សណ្ឋាគារ ឯករាជ្យ ហើយមានមនុស្សជាច្រើនបានមកដើរលេងកំសាន្តនៅទីនេះ ហើយនៅក្នុងឆ្នាំដដែល គេចាប់ផ្តើមធ្វើពង្រីកកំពង់ផែ ។
- ឆ្នាំ ១៩៧០ ពួកគេឈប់រស់នៅ ពីព្រោះ លន់ នល់បានធ្វើរដ្ឋប្រហារទម្លាក់ព្រះបាទនរោត្តមសីហនុ និងបានមកកាន់កាប់ប្រទេសកម្ពុជា ។
- ឆ្នាំ ១៩៧០- ១៩៧៥ គេប្រើកំពង់ផែសំរាប់ដាក់អាវុធសំរាប់ធ្វើសង្គ្រាម។
- ថ្ងៃទី១៣ ខែឧសភា ឆ្នាំ ១៩៧៥ ខ្មែរក្រហម បានកាន់កាប់ ទីក្រុងព្រះសីហនុ ហើយនិងខ្មែរក្រហមបានចាប់យកកប៉ាលរបស់ សហរដ្ឋអាមេរិក ដែលមានឈ្មោះ S.S Mayaguez ជាកម្មករដែលធ្វើការ នៅលើកប៉ាល់នោះ ហើយសហរដ្ឋអាមេរិកបានទម្លាក់គ្រាប់បែកដែលធ្វើអោយក្រុងព្រះសីហនុមានការខូចខាតយ៉ាងខ្លាំង រហូតដល់ពួកខ្មែរក្រហមប្រគល់កប៉ាល់និងមនុស្សទៅអោយសហរដ្ឋអាមេរិកវិញ ។
- ឆ្នាំ ១៩៨០ សង្គ្រាមបានបញ្ចប់ គេបានចាប់ផ្តើមសាងសង់ទីក្រុងសាជាថ្មី
- ឆ្នាំ ១៩៩៧ រដ្ឋាភិបាល បាន អោយកន្លែងសំរាប់អង្គការ ដុនបូស្កូកម្ពូជា សំរាប់ធ្វើសាលាបច្ចេកទេស នៅផ្លូវអូរប្រាំ សំរាប់យុជនក្រីក្រនៅទីក្រុងនេះ និងមកពីខេត្តផ្សេងៗទៀតដែលនៅភាគខាងត្បូងនៃប្រទេស កម្ពុជា ។
- ថ្ងៃទី ១១ ខែ កុម្ភះ ឆ្នាំ២០០៧ ព្រះបាទនរោត្តម សីហមុនី បានយាងមកក្រុងព្រះសីហនុ ឯកឧត្តម ស្បោងសារ៉ាត អភិបាលក្រុង បានទទួលព្រះមហាក្សត្រនៃព្រះរាជាណាចក្រកម្ពុជា ជាមួយនឹង ព្រះសង្ឃនិមន្តមកពីគ្រប់វត្តនិង ថ្នាក់អ្នកដឹកនាំគ្រប់ជាន់ថ្នាក់ នៅក្រុងព្រះសីហនុ និងលោកគ្រូ អ្នកគ្រូ សិស្សានុសិស្ស ហើយ និងសាលាបច្ចេកទេស ដុនបូស្កូ ក្រុងព្រះសីហនុ៕
២. ឆ្នេរសមុទ្រក្រុងព្រះសីហនុ
ឆ្នេរសមុទ្រក្រុងព្រះសីហនុ រមណីយដ្ឋាន ស្ថិតនៅក្នុងខេត្តព្រះសីហនុ ជាតំបន់ទេសចរណ៏គួរអោយចាប់អារម្មណ៏បំផុតនៅក្នុងខេត្តនេះ។ ឆ្នេរសមុទ្រនៅខេត្តព្រះសីហនុ ជាកន្លែងដែលគួរអោយ ចាប់អារម្មណ៍ណាស់ សំរាប់ទេសចរជាតិ និងទេសចរអន្តរជាតិ។
ក្រុងព្រះសីហនុគឺជាខេត្តដ៏តូចមួយនិងមានឆ្នេរសមុទ្រជាច្រើនហើយស្ថិតនៅក្នុងតំបន់ ត្រូពិចក្តៅនិងសើមដែលស្ថិតនៅភាគខាងលិចនិងខាងត្បូង មានឆ្នេរសមុទ្រដ៏ស្រស់ស្អាតជាច្រើន។ ចំនែកឯភាគខាងលិចឈៀងខាងត្បូងមានកំពង់ផែពាណិជ្ជកម្ម។ ចំពោះឆ្នេរសមុទ្រនៅតាមបណ្តោយទីក្រុងដែលចេញមកពីភាគខាងជើងទៅភាគខាងត្បូងមានដូចជា ឆ្នេរជ័យជំនះ ឆ្នេរកោះពស់ ឆ្នេរឯករាជ្យ ឆ្នេរសុខា ឆ្នេរអូឈឺទាលនិង ឆ្នេរអូត្រេស។ ក្រុងព្រះសីហនុជាខេត្តមួយដែលមានសោភ៏ណ្ឌភាពស្រស់ស្អាត។ មូលហេតុដោយសារក្រុងព្រះសីហនុមាន ទីកន្លែងកំសាន្តពិសេសទាក់ទាញ អារម្មណ៏ភ្ញៀវទេសចរណ៏ជាតិ និងអន្តរជាតិ គឺ ឆ្នេរសមុទ្រដ៏ស្រស់ស្អាតមានដូចជា ឆ្នេរសមុទ្រឯករាជ្យ ( អូរតែលប្រាំពីរជាន់) ឆ្នេរសុខា ឆ្នេរអូរឈើទាល អូរត្រេះ ឆ្នេរហាវៃ ឆ្នេរម្លប់ជ្រៃ ទឺកធ្លាក់ក្បាលឆាយជាដើម…..។
៣. ឆ្នេរអូឈើទាល
ឆ្នេរអូរឈើទាល ជាឆ្នេរមួយដែលមានសោភ័ណ្ឌភាពស្រស់ស្អាត ស្ថិតនៅក្នុងខេត្តព្រះសីហនុ។ អ្នកលក់បង្គងប៉ាកនៅសមុទ្រឆ្នេរនេះមានភាពទាក់ទាញនិងល្បីល្បាយជាខ្លាំងនៅក្នុងព្រះរាជាណាចក្រកម្ពុជាយើង។ ក្នុងមួយឆ្នាំៗឆ្នេនេះអាចទាក់ទាញភ្ញៀវទេសចរណ៏បានរាប់រយពាន់នាក់ចូលមកទស្សនានៅក្នុងក្រុងព្រះសីហនុដែលជាចំនែកមួយក្នុងការជួយអភិវឌ្ឍន៍ដល់កំនើនសេដ្ឋកិច្ចជាតិ។ អូរឈើទាលជាតំបន់ឆ្នេរមួយដែលមានទេសភាពធម្មជាតិស្រស់ល្អបំព្រងគួរអោយចាប់អារម្មណ៏ក្រៃលែង ។
អូរឈើទាលមានឆ្នេរខ្សាច់សស្អាត វែងអន្លាយនឹងមានដើមឈើជាច្រើនដុះអែបមាត់ឆ្នេរសមុទ្រមើលទៅជាជួរគួរអោយទាក់ទាញបំផុតហេតុនេះហើយឆ្នេរនេះក៏បានជាប់ជាសមាជិកក្លឹបឆ្នេរដែលស្អាតជាងគេក្នុងពិភពលោក។ នៅទីនោះមានតូបខ្ចុះរបស់អាជីវកររកស៊ីលក់ដូរយ៉ាងច្រើនសំរាប់ភ្ញៀវទេសចរណ៏ជួលអង្គុយលេង ឬសំរាកកាយនៅពេលដែលពួកគេបានមកដល់ទីកន្លែងនេះ។ ភ្ញៀវទេសចរណ៏ជាតិនិងអន្តរជាតិដែលបានធ្វើដំណើរកំសាន្តនៅឆ្នេរអូរឈើទាល អាចលេងទឹកសមុទ្រយ៉ាងសប្បាយរីករាយនិងយ៉ាងត្រជាក់ចិត្ត ឬពួកគេអាចជួលទូកដើម្បីធ្វើដំណើរកំសាន្តឆ្ពោះទៅកាន់កោះនានា ដែលភាគច្រើនគឺជាជនជាតិបរទេស។
ភ្ញៀវទេសចរណ៏មួយចំនួនចូលចិត្តលេងទឹក ជួលពោង ឬ ជួលអូប័រជិះកំសាន្តលេងយ៉ាងសប្បាយរីករាយ ។ ភ្ញៀវទេសចរណ៏អាចកុម្ម៉ង់ម្ហូបអាហារ ជាប្រភេទអាហារសមុទ្រ ដូចជា មឹក បង្គា ក្ដាម ត្រីសមុទ្រជាដើមដែលសុទ្ធសឹងតែជាអាហារមានឪជារសឈ្ងុយឆ្ងាញ់ពិសារ។ ក្រៅពីនេះភ្ញៀវទេសចរណ៏អាចទិញវត្ថុអនុស្សាវរីយ៏ ដែលធ្វើអំពីសំបកខ្យង ផ្កាថ្ម ខ្សែដៃ ខ្សែក …….ទាំងអស់នេះគឺជាសា្នដៃប្រជាពលរដ្ឋខ្មែរ នឹងមានអ្នកម៉ាស្សាផងដែរ។ ឆ្នេរអូរឈើទាលជាឆ្នេរដែលសំបូរភ្ញៀវទេសចរណ៏ជាតិ និងអន្តជាតិ មកកំសាន្តសើ្ទរតែរៀងរាល់ថ្ងៃ គ្មានថ្ងៃលោះឡើយជាពិសេសថ្ងៃឈប់សំរាក បុណ្យទាន ឬក៏ថ្ងៃសំរាកចុងសប្ដាហ៏ ។
៤. ឆ្នេរឯករាជ្យ
ឆេ្នរឯករាជ្យ ក៏ជាឆ្នេរមួយដែលមានភាពស្រស់ស្អាត ហើយក៏មានភ្ញៀវទេសចរណ៏ទៅលេងកំសាន្តនៅទីនោះច្រើនកុះករដែរ។ ឆ្នេរឯករាជ្យខាងលិចជាប់ឆ្នេរហាវ៉ៃ ខាងកើតជាប់នឹងឆ្នេរសុខា ឆ្នេរឯករាជ្យមានអគារដ៏ខ្ពស់សាងសង់ឡើងជាយូរមកហើយ ហើយអគារនេះមានប្រាំពីរជាន់។ រូបថ្មនៅឆ្នេរអូរតែលប្រាំពីរជាន់ ប្រជាជនខ្មែរយើងភាគច្រើននិយមហៅឆ្នេរឯករាជ្យថាឆ្នេរអូរតែលប្រាំពីរជាន់ ព្រោះថាអគារខ្ពស់នោះគឺជាសណ្ឋាគារដ៏ធំមួយ ស្ថិតនៅលើដីភ្នំខ្ពស់។ ពីមុនអគារនេះរងការខូចខាត និង ទ្រុឌទ្រោមយ៉ាងខ្លាំង ក៏ប៉ុន្តែឥឡូវនេះគេបានធ្វើការជួសជុលស្ថាបនាសាឡើងវិញ ធ្វើអោយអូរតែលប្រាំពីរជាន់មានភាពស្រស់ស្អាតជាងមុនឆ្ងាយណាស់ រួមជាមួយនឹងឆ្នេរខ្សាច់សក្បុសតាមដងផ្លូវមានដើមក្ងោកពណ៌ក្រហមឆ្អៅ នឹង អមជាមួយនឹងសួនច្បារដ៏ស្អាតផងដែរ ។
៥. ឆ្នេរសមុទ្រសុខា
អូរតែលសុខា គឺជាឈ្មោះរបស់សណ្ឋារគារមួយដែលស្ថិតនៅក្នុងក្រុងព្រះសីហនុ ដែលសាងសង់ឡើងនៅជាប់តាមបណ្ដោយឆ្នេរសមុទ្រសុខា មនុស្សភាគច្រើននិយមហៅថាឆ្នេរសុខា ។ ឆ្នេរសមុទ្រសុខាគឺជាឆ្នេរសមុទ្រឯកជនមួយដែលមានប្រវែង 1,5km ដែលទិសខាងកើតជាប់នឹងឆ្នេរអូរឈើទាលហើយលាតសន្ធឹងយ៉ាងវែងទៅទិសខាងលិចជាប់នឹងឆ្នេរសមុទ្រឯករាជ្យ ឆ្នេរអូរតែលប្រាំពីរជាន់ ។ សំរាប់នៅក្នុងសណ្ឋាគារសុខាគឺមានកន្លែងកំសាន្តល្អៗជាច្រើន នៅទីនោះភ្ញៀវទេសចរណ៏អាចស្នាក់នៅលេងកំសាន្តនៅក្នុងសណ្ឋាគារបាន ។ ចំពោះអ្នកដែលត្រូវការកន្លែងស្រស់ត្រកាលសំរាប់រៀបអាពាហ៏ពិពាហ៏អាចជួលដោយបង់ថ្លៃ ។
នៅទីនោះមានបំរើសេវាកម្មល្អៗ ជាច្រើនយ៉ាងរហ័សទាន់ចិត្ត ប្រសិនបើអ្នកមិនមានកន្លែងសំរាប់រៀបចំពិធីរៀបមង្គលការ អ្នកអាចទៅទំនាក់ទំនងតាមសេចក្ដីតំរូវការនៅក្នុងសណ្ឋារគារសុខា។ ដោយសារនៅក្នុងសណ្ឋាគារសុខាមានភាពស្រស់ស្អាតដូចនេះហើយទើបមានភ្ញៀវទរសចរណ៏ចូលទៅទស្សនាកំសាន្តជារៀងរាល់ថ្ងៃ។ អូរតែលសុខាមានអាងហែលទឹកដ៏ល្អនៅចំកណ្ដាលហើយមានកន្លែងសម្រាកសំរាប់ទទួលភ្ញៀវដ៏ល្អប្រណីតផងដែរ។ នៅផ្នែកខាងក្រោយឆ្នេរសមុទ្រក៏មានផ្ទះសំណាក់ជាច្រើននឹងមានទេសភាពស្រស់ស្អាតណាស់។ ក្រៅពីនេះឆ្នេរសុខាក៏មានរូបសំណាកកន្ទុយនាគមួយ យ៉ាងធំដែលធ្វើឡើងនៅអែបមាត់ឆ្នេរសមុទ្រហើយក្បាលរបស់វាគេធ្វើនៅខាងក្នុងទីធ្លានៃសណ្ឋាគារសុខា ។
៦. ឆ្នេរអូត្រេះ
អូរត្រេះ គឺជាឆ្នេរសមុទ្រមួយដែលស្ថិតនៅក្នុងខេត្តព្រះសីហនុដែរ វាមានសោភ័ណ្ឌភាពស្រស់ស្អាតមិនចាញ់ឆ្នេរអូរឈើទាល ឆ្នេរសុខា ឆ្នេរហាវៃ ឡើយ…..។ វាជាឆ្នេរមួយដែលភាពស្ងប់ស្ងាត់នៅក្នុងក្រុង ព្រោះវាស្ថិតនៅដាច់ឆ្ងាយបន្តិច ប៉ុន្តែបច្ចុប្បន្នក៏មិនសូវស្ងាត់ ដូចពីមុនទេ ពីព្រោះដោយសារនៅទីនោះមានទេសភាពស្រស់ស្អាតមើលទៅគួរអោយអោយចង់គយគន់ក្រៃលែងហើយមានភ្ញៀវទេសចរណ៏មួយចំនួនចូលចិត្តកន្លែងស្ងប់ស្ងាត់ ក៏និយមទៅកំសាន្តនៅឆ្នេរអូរត្រេះដែរ ជាហេតុធ្វើអោយឆ្នេរ អូរត្រេះមានសភាពអូរអរជាងមុន មានភ្ញៀវទេសចរណ៏អន្តរជាតិ ទៅកំសាន្តយ៉ាងកុះករ ។ ក៏ប៉ុន្តែនៅទីនោះពុំទាន់មានភ្លើងអគ្គីសនីគ្រប់គ្រាន់ នៅឡើយទេ គឺវាមានតែកន្លែងមួយចំនួន ប៉ុណ្ណោះដែលមានម៉ាស៊ីនភ្លើងប្រើប្រាស់ សំរាប់ភាពចាំបាច់របស់ពួកគេ។ ជាមួយគ្នានេះផងដែរ នៅឆ្នេរអូរត្រេះក៏មានការជិះក្ដារបន្ទះ នៅលើទឹកហើយនិងជួលទូកកាយ៉ាក់ចែវលេង រួមទាំងមានកីឡាជិះក្ដារមានក្ដោងយ៉ាងសប្បាយរីករាយផងដែរ ។ ភាគច្រើនគឺជាភ្ញៀវបរទេសទៅកំសាន្តនៅឆ្នេរអូរត្រេះហើយភ្ញៀវទេសចរណ៏អាចធ្វើការលំហែកាយ ដោយអ្នកខ្លះជួលអូរប័រ ឬពោងសំរាប់លេងទឹក។ ភ្ញៀវទេសចរណ៏អាចធ្វើដំណើរទៅកាន់កោះនានាផងដែរ ។
៧. ឆ្នេរហាវ៉ៃ
ឆ្នេរហាវៃ គឺជាឆ្នេរមួយដែលមានភាពស្រស់ស្អាតពោរពេញទៅដោយដើមម្ជុលជាតំបន់ឆ្នេរដែលមានម្លប់ត្រជាក់ល្ហឹមមានភ្ញៀវទេសចរណ៏ទៅកំសាន្តនៅទីនោះច្រើនគួរសម។ ទេសភាពមើលពីស្ពានកោះពស់មានទូកម៉ាស៊ីនតូចៗមួយចំនួនដែលនៅទំនេររង់ចាំភ្ញៀវទេសចរណ៏ជាតិអន្តរជាតិជួលជិះធ្វើដំណើរកំសាន្តឆ្ពោះទៅកាន់កោះពស់។ លក្ខណៈពិសេសនៅតាមដងបណ្ដោយឆ្នេរហាវ៉ៃមានខ្សាច់សស្អាតមិនចាញ់ឆ្នេរសមុទ្រផ្សេងៗឡើយ។ អ្នកវិនិយោគទុនមានគំរោងសាងសង់សណ្ឋារគារ ផ្ទះសំណាក់ បាំងកាឡូ និងមានកន្លែងកំសាន្តជាច្រើនផ្នែកទៀត។
៨. ឆ្នេរជ័យជំនះ
ជាឆ្នេរដែលមានសភាពស្រស់ស្អាតនៅខេត្តព្រះសីហនុ ត្បិតថាវាមានប្រវែងខ្លី តែវាអាចទាញយកភ្ញៀវទេសចរណ៏ដែលចូលចិត្តភាពស្ងប់ស្ងាត់ បានយ៉ាងច្រើន តែនៅពេលបច្ចុប្បន្ននេះឆ្នេរនេះត្រូវបាន ក្រុមហ៊ុនបរទេស(ចិន) សុំសិទ្ធិសាងសង់អគារធំៗជាច្រើន ហើយវាសឹងតែក្លាយជាឆ្នេរឯកជនទៅហើយសព្ធថ្ងៃ។
៩. រមណីយដ្ឋានទឹកធ្លាក់ក្បាលឆាយ
រមណីយដ្ឋានទឹកធ្លាក់ក្បាលឆាយ គឺជាតំបន់ទឹកធ្លាក់មួយកន្លែងដែលស្ថិតនៅក្នុងខេត្តព្រះសីហនុដែរ។ ទឹកធ្លាក់ក្បាលឆាយនេះជារមណីយដ្ឋានមួយដែលមាន ភ្ញៀវទេសចរណ៏ ទៅលេងយ៉ាងច្រើន កុះករនៅថ្ងៃឈប់សំរាកពីការងារ រឺ បុណ្យជាតិ ។ យើងសង្កេតឃើញមាន ប្រជាពលរដ្ឋខ្មែរ មានលក់នូវវត្ថុអានុស្សាវរីយ៏ និង របស់ផ្សេងៗ ទៀត ដែលវាជាសេចក្ដីតំរូវការរបស់ភ្ញៀវទេសចរណ៏ ក្រៅពីភ្ញៀវទេសចរណ៏ជាតិ តំបន់ទឹកធ្លាក់ក្បាលឆាយក៏មាន ភ្ញៀវទេសចរណ៏អន្តរជាតិមកចូលរួមទស្សនា កំសាន្តយ៉ាងសប្បាយរីករាយផងដែរ ។ ក្បាលឆាយជារមណីយដ្ឋានដ៏ស្រស់ត្រកាលមួយ ដែលជាតំបន់ពាំនាំនូវថវិការជួយដល់ប្រជាពលរដ្ឋខ្មែរនិងប្រទេសកម្ពុជាយើងអោយមានភាពរីកចំរើនអភិវឌ្ឍន៏ វិស័យទេសចរណ៏ជាតិនៅក្នុងព្រះរាជាណាចក្រកម្ពុជា ។